نصائح رمضانية ؛) 💛

﷽ 

احبتي قرب شهر الخير يارب طول اعمارنا وبلغنا صيامه وقيامه 

واقبل منا اعمالنا الصالحة❤️

حبيباتي شهر رمضان شهر مو كأي شهر يجي ويروح ما نندم عليه ونتحسف على الأيام اللي قصرنا فيها فيه ونندب حظنا'

وقسمي اوقاتك ولا تكثرين اكل، لان الشبع مانع من انك تطلبين العلم وتقومين وتصلين يصير كل شيء ثقيل عليك

حافظي على الوتر واجلسي بسجادتك من صلاة الفجر إلى الشروق، وصلي الضحى، واكثري من قراءة القرآن
قراءة جزء واحد تستغرق فقط ٢٠ دقيقه(ثلث ساعة فقط) عيب من الـ ٢٤ ساعة تخلين ٢٠ دقيقه منها للقرآن فقط

وتذكري ان قليل دائم خير من كثير منقطع

ولا تبدين بدايه قوية لأنك بالعشر الأواخر تفترين

ولا تضيعين نصيحة لك فيه ليله بهالشهر خير من الف شهر الله اكبر هنيئا لمن نالها..

اكثري من الدعاء وألحي على الله واذكري اخوانك المسلمين بدعوات تنالين مثلها.

وأكتبي لك قائمة أمنيات وكل يوم ادعي بهن.💘

شيء ثاني بينك وبين احد خلاف حاولي تتحببين له ولا بأس جاملي لأجل الإصلاح

واذا كان بينك وبين اقاربك خلاف او بين ناس خلاف حاولي قدر المستطاع تصلحين اجر الإصلاح عظيم وكبير

واذا دعوك لعزيمه وجبيهم لله< يعني روحي لهم واحتسبي الأجر ما تدرين يمكن يلتم شمل العائلة بعد الله بسببك

الله يذكره بالخير د.اسماء العوفي بالمستوى الأول جابت لنا سؤال بالاختبار النهائي اكتبِ ٥ اسطر عن صلاح القلب.. خارج المنهج عساه للجنة الباردة هي ووالدينه

رمضان فرصتك للتغير والتطوير تقدرين تتخلين عن اشياء كثير وتقلعين عنهن بعد فضل ربي في رمضان كما انه فرصه للي يدخن يترك التدخين

كما هو فرصتك لترك ماحرم الله والنظر اليه وبثه مو ناقصين اوزار الله يصلح احوالنا واحوال المسلمين.

جميع ما يبث لك في رمضان يعاد بعد رمضان لكن رمضان والروحانيه لاتعاد

انتبهِ من الغيبه والنميمه والتطاول على اعراض الناس واذا دعتك نفسك لهذا ذكريها إنها ثلث عذاب القبر وتذكري عذابها الأليم وانها تحصد الحسنات وان (ترك مالا يعنيك فايدة< هذي حكمة ابوي عساه للجنة

والصيام يربي على الصبر..

واحتسبي الأجر على اي شي تسوينه ومو لازم كل العالم تدري.

اذا كنتِ قد بدأتِ برواية او شيء لافائدة فيه اتركيه الى بعد رمضان عندك شهرين كاملين وزيادة إن كنا من الحيين.

شيء آخر خففِ من وسائل التواصل وابتعدي عن السماجات والنكت اللتي لاتسمن ولا تغني من جوع وابتعدي تماماً عن من يوردها لكِ.

اتمنى اني ماطولت عليكم دعواتي لي ولكم بالتوفيق والسداد والسعادة بالدارين وللشريعيات خاصة.

هذه نصائح اهديها لنفسي اولاً ومن ثم لكم للفائدة، عسى ربي ان ينفع بنا جميعاً ويهدينا ويثبتنا على الصراط المستقيم .